Store og små fann vegen til Idrettsbanen då årets Grendacup gjekk av stabelen. Trass i litt skiftande vêr, skein sola over Langevåg store delar av dagen – og på bana var det minst like mykje solskin i form av smil, jubel og god stemning.
Frå morgon av var det liv og røre. Minicupen samla dei yngste, som med stor innsats og engasjement viste at fotball først og fremst handlar om leik og glede. Barne- og ungdomsklassane bød på mange tette oppgjer, og publikum fekk oppleve alt frå elegante mål til heroisk forsvarsspel.
I seniorcupen var det høg temperatur og mykje nerve. Til slutt stod Hollywood igjen som vinnarar av A-sluttspelet, etter å ha slått Vodlahaugane FC i finalen. I B-sluttspelet trekte Vespestads Gull det lengste strået og kunne heve B-pokalen.
Ein stor takk går til alle frivillige som har lagt ned time etter time med førebuingar, til dommarar, kioskpersonell, arrangørar – og ikkje minst til publikum som skapte ei fantastisk ramme rundt arrangementet.
Grendacupen 2025 minte oss på kvifor dette har blitt ein kjær tradisjon i Langevåg: fellesskap, idrettsglede og bygdestoltheit hand i hand.
